Job

¹וַיַּ֥עַן אֱלִיה֗וּ וַיֹּאמַֽר׃

²הֲ֭זֹאת חָשַׁ֣בְתָּ לְמִשְׁפָּ֑ט אָ֝מַ֗רְתָּ צִדְקִ֥י מֵאֵֽל׃

³כִּֽי ־תֹ֭אמַר מַה ־יִּסְכָּן ־לָ֑ךְ מָֽה ־אֹ֝עִ֗יל מֵֽחַטָּאתִֽי׃

⁴אֲ֭נִי אֲשִֽׁיבְךָ֣ מִלִּ֑ין וְֽאֶת ־רֵעֶ֥יךָ עִמָּֽךְ׃

⁵הַבֵּ֣ט שָׁמַ֣יִם וּרְאֵ֑ה וְשׁ֥וּר שְׁ֝חָקִ֗ים גָּבְה֥וּ מִמֶּֽךָּ׃

⁶אִם ־חָ֭טָאתָ מַה ־תִּפְעָל ־בּ֑וֹ וְרַבּ֥וּ פְ֝שָׁעֶ֗יךָ מַה ־תַּעֲשֶׂה ־לּֽוֹ׃

⁷אִם ־צָ֭דַקְתָּ מַה ־תִּתֶּן ־ל֑וֹ א֥וֹ מַה ־מִיָּדְךָ֥ יִקָּֽח׃

⁸לְאִישׁ ־כָּמ֥וֹךָ רִשְׁעֶ֑ךָ וּלְבֶן ־אָ֝דָ֗ם צִדְקָתֶֽךָ׃

⁹מֵ֭רֹב עֲשׁוּקִ֣ים יַזְעִ֑יקוּ יְשַׁוְּע֖וּ מִזְּר֣וֹעַ רַבִּֽים׃

¹⁰וְֽלֹא ־אָמַ֗ר אַ֭יֵּה אֱל֣וֹהַּ עֹשָׂ֑י נֹתֵ֖ן זְמִר֣וֹת בַּלָּֽיְלָה׃

¹¹מַ֭לְּפֵנוּ מִבַּהֲמ֣וֹת אָ֑רֶץ וּמֵע֖וֹף הַשָּׁמַ֣יִם יְחַכְּמֵֽנוּ׃

¹²שָׁ֣ם יִ֭צְעֲקוּ וְלֹ֣א יַעֲנֶ֑ה מִ֝פְּנֵ֗י גְּא֣וֹן רָעִֽים׃

¹³אַךְ ־שָׁ֭וְא לֹא ־יִשְׁמַ֥ע׀ אֵ֑ל וְ֝שַׁדַּ֗י לֹ֣א יְשׁוּרֶֽנָּה׃

¹⁴אַ֣ף כִּֽי ־תֹ֭אמַר לֹ֣א תְשׁוּרֶ֑נּוּ דִּ֥ין לְ֝פָנָ֗יו וּתְח֥וֹלֵֽל לֽוֹ׃

¹⁵וְעַתָּ֗ה כִּי ־אַ֭יִן פָּקַ֣ד אַפּ֑וֹ וְלֹֽא ־יָדַ֖ע בַּפַּ֣שׁ מְאֹֽד׃

¹⁶וְ֭אִיּוֹב הֶ֣בֶל יִפְצֶה ־פִּ֑יהוּ בִּבְלִי ־דַ֝֗עַת מִלִּ֥ין יַכְבִּֽר׃ פ