2 Chronicles

¹የሳባም፡ንግሥት፡የሰሎሞንን፡ዝና፡በሰማች፡ጊዜ፡በግመሎች፡ላይ፡ሽቱና፡ብዙ፡ወርቅ፡የከበረም፡ዕንቍ፡ አስጭና፡ከታላቅ፡ጓዝ፡ጋራ፡ሰሎሞንን፡በኢየሩሳሌም፡በእንቆቅልሽ፡ትፈትነው፡ዘንድ፡መጣች፤ወደ፡ ሰሎሞንም፡በገባች፡ጊዜ፡በልቧ፡ያለውን፡ዅሉ፡አጫወተችው።

²ሰሎሞንም፡የጠየቀችውን፡ዅሉ፡ፈታላት፤ሰሎሞንም፡ያልፈታው፡ስውር፡ነገር፡አልነበረም።

³የሳባም፡ንግሥት፡የሰሎሞንን፡ጥበብ፥ሠርቶትም፡የነበረውን፡ቤት፥የማእዱንም፡መብል፥

⁴የብላቴናዎቹንም፡አቀማመጥ፥የሎሌዎቹንም፡አሠራር፡አለባበሳቸውንም፥ጠጅ፡አሳላፊዎቹንም፡ አለባበሳቸውንም፡በእግዚአብሔርም፡ቤት፡የሚያሳርገውን፡መሥዋዕት፡ባየች፡ጊዜ፡መንፈስ፡አልቀረላትም።

⁵ንጉሡንም፡አለችው፦ስለ፡ነገርኽና፡ስለ፡ጥበብኽ፡በአገሬ፡ሳለኹ፡የሰማኹት፡ዝና፡እውነት፡ነው።

⁶እኔ፡ግን፡መጥቼ፡በዐይኔ፡እስካየኹ፡ድረስ፡የነገሩኝን፡አላመንኹም፤እንሆ፥የጥበብኽን፡ታላቅነት፡ እኩሌታ፡አልነገሩኝም፤ከሰማኹት፡ዝና፡ትበልጣለኽ።

⁷በፊትኽ፡ዅልጊዜ፡የሚቆሙ፡ጥበብኽንም፡የሚሰሙ፡ሰዎችኽና፡እነዚህ፡ባሪያዎችኽ፡ምስጉኖች፡ናቸው።

⁸በአምላክኽ፡በእግዚአብሔር፡ፊት፡ንጉሥ፡እንድትኾን፡በዙፋኑ፡ላይ፡ያስቀምጥኽ፡ዘንድ፡የወደደኽ፡ አምላክኽ፡እግዚአብሔር፡ቡሩክ፡ይኹን፤አምላክኽ፡እስራኤልን፡ለዘለዓለም፡ያጸናቸው፡ዘንድ፡ ወዷ፟ቸዋልና፥ስለዚህ፡ፍርድና፡ጽድቅ፡ታደርግ፡ዘንድ፡በላያቸው፡አነገሠኽ።

⁹ለንጉሡም፡መቶ፡ኻያ፡መክሊት፡ወርቅ፥እጅግም፡ብዙ፡ሽቱ፡የከበረም፡ዕንቍ፡ሰጠችው፤የሳባም፡ http://www.gzamargna.net www.ethiopianorthodox.org ንግሥት፡ለንጉሡ፡ለሰሎሞን፡እንደ፡ሰጠችው፡ያለ፡ሽቱ፡ከቶ፡አልነበረም።

¹⁰ከኦፊርም፡ወርቅ፡ያመጡ፡የኪራም፡ባሪያዎችና፡የሰሎሞን፡ባሪያዎች፡የሰንደል፡ዕንጨትና፡የከበረ፡ዕንቍ፡ ደግሞ፡አመጡ።

¹¹ንጉሡም፡ከሰንደሉ፡ዕንጨት፡ለእግዚአብሔር፡ቤትና፡ለንጉሡ፡ቤት፡ደርብ፥ለመዘምራኑም፡መሰንቆና፡ በገና፡አደረገ፤እንደዚህም፡ያለ፡በይሁዳ፡ምድር፡ከቶ፡አልታየም፡ነበር።

¹²የሳባም፡ንግሥት፡ወደ፡ንጉሡ፡ካመጣችው፡የሚበልጥ፥ንጉሡ፡ሰሎሞን፡የወደደችውን፡ዅሉ፡ከርሱም፡ የለመነችውን፡ዅሉ፡ሰጣት፤ርሷም፡ተመልሳ፡ከባሪያዎቿ፡ጋራ፡ወደ፡ምድሯ፡ኼደች።

¹³ነጋድራሶችና፡ነጋዴዎች፡ካመጡለት፡ሌላ፡በየዓመቱ፡ወደ፡ሰሎሞን፡የሚመጣ፡የወርቅ፡ሚዛን፡ስድስት፡ መቶ፡ስድሳ፡ስድስት፡መክሊት፡ወርቅ፡ነበረ።

¹⁴የዐረብም፡ነገሥታት፡ዅሉ፡የምድሩም፡ሹማምት፡ወርቅና፡ብር፡ወደ፡ሰሎሞን፡ያመጡ፡ነበር።

¹⁵ንጉሡም፡ሰሎሞን፡በጥፍጥፍ፡ወርቅ፡ኹለት፡መቶ፡አላባሽ፡አግሬ፡ጋሻ፡አሠራ፤በአንዱም፡አላባሽ፡ አግሬ፡ጋሻ፡ውስጥ፡የገባው፡ጥፍጥፍ፡ወርቅ፡ስድስት፡መቶ፡ሰቅል፡ነበረ።

¹⁶ከጥፍጥም፡ወርቅ፡ሦስት፡መቶ፡ጋሻ፡አሠራ፤በአንዱም፡ጋሻ፡የገባው፡ወርቅ፡ሦስት፡መቶ፡ሰቅል፡ ነበረ፤ንጉሡም፡የሊባኖስ፡ዱር፡በተባለው፡ቤት፡ውስጥ፡አኖራቸው።

¹⁷ንጉሡም፡ደግሞ፡ከዝኆን፡ጥርስ፡ታላቅ፡ዙፋን፡አሠራ፥በጥሩ፡ወርቅም፡ለበጠው።

¹⁸ከዙፋኑም፡ጋራ፡ተጋጥመው፡ወደ፡ዙፋኑም፡የሚያስኼዱ፡ስድስት፡ዕርከኖች፡ነበሩ፤የወርቅ፡ብርኵማም፡ ነበረ፤በዚህና፡በዚያም፡በመቀመጫው፤አጠገብ፡ኹለት፡የክንድ፡መደገፊያዎች፡ነበሩበት፥በመደገፊያዎችም፡ አጠገብ፡ኹለት፡አንበሳዎች፡ቆመው፡ነበር።

¹⁹በስድስቱም፡ዕርከኖች፡ላይ፡በዚህና፡በዚያ፡ዐሥራ፡ኹለት፡አንበሳዎች፡ቆመው፡ነበር፤በመንግሥታት፡ ዅሉ፡እንዲህ፡ያለ፡ሥራ፡አልተሠራም።

²⁰ንጉሡም፡ሰሎሞን፡የሚጠጣበት፡ዕቃ፡ዅሉ፡የወርቅ፡ነበረ፥የሊባኖስ፡ዱር፡በተባለውም፡ቤቱ፡የነበረው፡ ዕቃ፡ዅሉ፡ጥሩ፡ወርቅ፡ነበረ፤በሰሎሞን፡ዘመን፡ብር፡ከቶ፡አይቈጠርም፡ነበር።

²¹ለንጉሡም፡ከኪራም፡ባሪያዎች፡ጋራ፡ወደ፡ተርሴስ፡የሚኼዱ፡መርከቦች፡ነበሩት፤በሦስት፡በሦስት፡ ዓመትም፡አንድ፡ጊዜ፡የተርሴስ፡መርከቦች፡ወርቅና፡ብር፡የዝኆንም፡ጥርስ፡ዝንጀሮና፡ዝጕርጕር፡ወፍም፡ ይዘው፡ይመጡ፡ነበር።

²²ንጉሡም፡ሰሎሞን፡ከምድር፡ነገሥታት፡ዅሉ፡በባለጠግነትና፡በጥበብ፡በለጠ።

²³የምድርም፡ነገሥታት፡ዅሉ፡እግዚአብሔር፡በልቡ፡ያኖረውን፡ጥበቡን፡ይሰሙ፡ዘንድ፡የሰሎሞንን፡ፊት፡ ሊያዩ፡ይመኙ፡ነበር።

²⁴እያንዳንዱም፡ገጸ፡በረከቱን፥የወርቅንና፡የብርን፡ዕቃ፥ልብስንና፡የጦር፡ መሣሪያን፥ሽቱውንም፥ፈረሶችንና፡በቅሎዎችን፡እየያዘ፡በየዓመቱ፡ያመጣ፡ነበር።

²⁵ሰሎሞንም፡ለፈረሶችና፡ለሠረገላዎች፡አራት፡ሺሕ፡ጋጥ፥ዐሥራ፡ኹለት፡ሺሕም፡ፈረሰኛዎች፡ ነበሩት፥በሠረገላዎችም፡ከተማዎች፥ከንጉሡም፡ጋራ፡በኢየሩሳሌም፡አኖራቸው።

²⁶ከኤፍራጥስም፡ወንዝ፡ዠምሮ፡እስከፍልስጥኤም፡ምድርና፡እስከግብጽ፡ዳርቻ፡ድረስ፡ባሉ፡ነገሥታት፡ ዅሉ፡ላይ፡ነገሠ።

²⁷ንጉሡም፡ብሩን፡በኢየሩሳሌም፡እንደ፡ድንጋይ፡እንዲበዛ፡አደረገው፤የዝግባውንም፡ዕንጨት፡ብዛት፡ በቈላ፡እንደሚበቅል፡ሾላ፡አደረገው።

²⁸ለሰሎሞንም፡ፈረሶች፡ከግብጽና፡ከየአገሩ፡ዅሉ፡ያመጡለት፡ነበር።

²⁹የቀረውም፡ፊተኛውና፡ዃለኛው፡የሰሎሞን፡ነገር፡በነቢዩ፡በናታን፡ታሪክ፥በሴሎናዊውም፡በኦሒያ፡ http://www.gzamargna.net www.ethiopianorthodox.org ትንቢት፥ስለ፡ናባጥም፡ልጅ፡ስለ፡ኢዮርብዓም፡ባየው፡በባለራእዩ፡በአዶ፡ራእይ፡የተጻፈ፡አይደለምን፧

³⁰ሰሎሞንም፡በኢየሩሳሌም፡በእስራኤል፡ዅሉ፡ላይ፡አርባ፡ዓመት፡ነገሠ።

³¹ሰሎሞንም፡ከአባቶቹ፡ጋራ፡አንቀላፋ፥በአባቱም፡በዳዊት፡ከተማ፡ተቀበረ፤ልጁም፡ሮብዓም፡በርሱ፡ፋንታ፡ ነገሠ።