Isaiah

¹እንዲህም፡ኾነ፤ንጉሡ፡ሕዝቅያስ፡ይህን፡በሰማ፡ጊዜ፡ልብሱን፡ቀደደ፥ማቅም፡ለበሰ፥ወደእግዚአብሔርም፡ ቤት፡ገባ።

²የቤቱንም፡አዛዥ፡ኤልያቄምን፡ጸሓፊውንም፡ሳምናስን፡የካህናቱንም፡ሽማግሌዎች፡ማቅ፡ለብሰው፡ወደ፡ ነቢዩ፡ወደዓሞጽ፡ልጅ፡ወደ፡ኢሳይያስ፡ይኼዱ፡ዘንድ፡ላካቸው።

³እነርሱም፦ሕዝቅያስ፡እንዲህ፡ይላል፦ይህ፡ቀን፡የመከራና፡የተግሣጽ፡የዘለፋም፡ቀን፡ነው፤ልጆች፡ የሚወለዱበት፡ጊዜ፡ደርሷል፡ለመውለድም፡ኀይል፡የለም።

⁴ምናልባት፡በሕያው፡አምላክ፡ላይ፡ይገዳደር፡ዘንድ፡ጌታው፡የአሶር፡ንጉሥ፡የላከውን፡የራፋስቂስን፡ቃል፡ አምላክኽ፡እግዚአብሔር፡ይሰማ፡እንደ፡ኾነ፥አምላክኽ፡እግዚአብሔር፡ስለሰማው፡ቃል፡ይገሥጸው፡እንደ፡ ኾነ፥ስለዚህ፡ለቀረው፡ቅሬታ፡ጸልይ፡አሉት።

⁵እንዲሁ፡የንጉሡ፡የሕዝቅያስ፡ባሪያዎች፡ወደ፡ኢሳይያስ፡መጡ።

⁶ኢሳይያስም፦ለጌታችኹ፦እግዚአብሔር፡እንዲህ፡ይላል፦የአሶር፡ንጉሥ፡ባሪያዎች፡ስለ፡ ሰደቡኝ፥ስለሰማኸው፡ቃል፡አትፍራ።

⁷እንሆ፥በላዩ፡መንፈስን፡እሰዳ፟ለኹ፥ወሬንም፡ይሰማል፥ወደ፡ምድሩም፡ይመለሳል፤በምድሩም፡በሰይፍ፡ እንዲወድቅ፡አደርጋለኹ፡በሉት፡አላቸው።

⁸የአሶርም፡ንጉሥ፡ከለኪሶ፡እንደ፡ራቀ፡ሰምቶ፡ነበርና፥ራፋስቂስ፡ተመልሶ፡በልብና፡ሲዋጋ፡አገኘው።

⁹ርሱም፦የኢትዮጵያ፡ንጉሥ፡ቲርሐቅ፡ሊዋጋኽ፡መጥቷል፡የሚል፡ወሬ፡ሰማ።በሰማም፡ጊዜ፡ወደ፡ ሕዝቅያስ፡መልእክተኛዎችን፡ላከ፥

¹⁰እንዲህ፡ሲል፦ለይሁዳ፡ንጉሠ፡ለሕዝቅያስ፡እንዲህ፡ብላችኹ፡ንገሩት፦ኢየሩሳሌም፡በአሶር፡ንጉሥ፡ እጅ፡አትሰጥም፡ብሎ፡የምትታመንበት፡አምላክኽ፡አያታል፟ኽ።

¹¹እንሆ፥የአሶር፡ነገሥታት፡በምድር፡ዅሉ፡ላይ፡ያደረጉትን፥እንዴትስ፡እንዳጠፏቸው፡ሰምተኻል፤አንተስ፡ ትድናለኽን፧

¹²አባቶቼ፡ያጠፏቸውን፡ጎዛንን፥ካራንን፥ራፊስን፥በተላሳር፡የነበሩትንም፡የዔዴንን፡ልጆች፡የአሕዛብ፡ አማልክት፡አዳኗቸውን፧

¹³የሐማት፡ንጉሥ፥የአርፋድ፡ንጉሥ፥የሴፈርዋይም፡ከተማ፡ንጉሥ፥የሄናና፡የዒዋ፡ንጉሥ፡ወዴት፡አሉ፧

¹⁴ሕዝቅያስም፡ደብዳቤውን፡ከመልእክተኛዎች፡እጅ፡ተቀብሎ፡አነበበው፤ሕዝቅያስም፡ወደእግዚአብሔር፡ ቤት፡ወጥቶ፡በእግዚአብሔር፡ፊት፡ዘረጋው።

¹⁵ሕዝቅያስም፡ወደ፡እግዚአብሔር፡እንዲህ፡ብሎ፡ጸለየ።

¹⁶አቤቱ፥በኪሩቤል፡ላይ፡የምትቀመጥ፡የእስራኤል፡አምላክ፡የሰራዊት፡ጌታ፡ሆይ፥አንተ፡ብቻኽን፡የምድር፡ መንግሥታት፡ዅሉ፡አምላክ፡ነኽ፤ሰማይንና፡ምድርን፡ፈጥረኻል።

¹⁷አቤቱ፥ዦሮኽን፡አዘንብልና፡ስማ፤አቤቱ፥ዐይንኽን፡ክፈትና፡እይ፤በሕያው፡አምላክ፡ላይ፡ይገዳደር፡ ዘንድ፡የላከውን፡የሰናክሬም፡ቃል፡ስማ።

¹⁸አቤቱ፥በእውነት፡የአሶር፡ነገሥታት፡ዓለሙን፡ዅሉ፡አገሮቻቸውንም፡አፍርሰዋል፥

¹⁹አማልክታቸውንም፡በእሳት፡ላይ፡ጥለዋል፤የዕንጨትና፡የድንጋይ፡የሰው፡እጅ፡ሥራ፡ነበሩ፡እንጂ፡ አማልክት፡አልነበሩምና፡ስለዚህ፡አጥፍተዋቸዋል።

²⁰እንግዲህም፡አምላካችን፡አቤቱ፥የምድር፡መንግሥታት፡ዅሉ፡አንተ፡ብቻ፡እግዚአብሔር፡እንደ፡ኾንኽ፡ ያውቁ፡ዘንድ፡ከእጁ፡አድነን። http://www.gzamargna.net www.ethiopianorthodox.org

²¹የዓሞጽ፡ልጅ፡ኢሳይያስ፡እንዲህ፡ብሎ፡ወደ፡ሕዝቅያስ፡ላከ፦የእስራኤል፡አምላክ፡እግዚአብሔር፡ እንዲህ፡ይላል፦ስለአሶር፡ንጉሥ፡ስለ፡ሰናክሬም፡ወደ፡እኔ፡ለምነኻልና፥

²²እግዚአብሔር፡ስለ፡ርሱ፡የተናገረው፡ቃል፡ይህ፡ነው፦ድንግሊቱ፡የጽዮን፡ልጅ፡ቀላል፡ አድርጋኻለች፥በንቀትም፡ሥቃብኻለች፤የኢየሩሳሌም፡ልጅ፡ራሷን፡ነቅንቃብኻለች።

²³የተገዳደርኸው፡የሰደብኸውስ፡ማን፡ነው፧ቃልኽንስ፡ከፍ፡ከፍ፡ያደረግኽበት፡ዐይንኽንስ፡ወደ፡ላይ፡ ያነሣኽበት፡ማን፡ነው፧በእስራኤል፡ቅዱስ፡ላይ፡ነው።

²⁴አንተም፦በሠረገላዬ፡ብዛት፡ወደተራራዎች፡ከፍታ፥ወደሊባኖስ፡ጥግ፡ላይ፡ወጥቻለኹ፤ረዣዥሞቹንም፡ ዝግባዎች፡የተመረጡትንም፡ጥዶች፡እቈርጣለኹ፥ወደከፍታውም፡ዳርቻ፡ወደቀርሜሎስ፡ዱር፡እገባለኹ።

²⁵ቈፈርኹም፡ውሃም፡ጠጣኹ፡የግብጽንም፡ወንዞች፡ዅሉ፡በእግሬ፡ጫማ፡አደርቃለኹ፡ብለኽ፡ በባሪያዎችኽ፡እጅ፡በጌታ፡ላይ፡ተገዳደርኽ።

²⁶እኔ፡ጥንቱን፡እንደ፡ሠራኹት፥ቀድሞውንም፡እንዳደረግኹት፡አልሰማኽምን፧አኹንም፡የተመሸጉትን፡ ከተማዎች፡የፍርስራሽ፡ክምር፡እስኪኾኑ፡ድረስ፡እንድታፈርስ፡አደረግኹኽ።

²⁷ስለዚህ፥የሚኖሩባቸው፡ሰዎች፡እጃቸው፡ዝሏል፥ደንግጠውም፡ታውከዋል፤እንደ፡ምድረ፡በዳ፡ ሣር፥እንደ፡ለመለመም፡ቡቃያ፥በሰገነትም፡ላይ፡እንዳለ፡ሣር፥ሳይሸት፡ዋግ፡እንደ፡መታው፡እኽል፡ ኾነዋል።

²⁸እኔ፡ግን፡መቀመጫኽንና፡መውጫኽን፡መግቢያኽንም፡በእኔም፡ላይ፡የተቈጣኸውን፡ቍጣ፡ ዐውቄያለኹ።

²⁹ቍጣኽና፡ትዕቢትኽ፡ወደ፡ዦሮዬ፡ደርሷልና፥ስለዚህ፡ስናጋዬን፡በአፍንጫኽ፡ልጓሜንም፡በከንፈርኽ፡ አደርጋለኹ፥በመጣኽበትም፡መንገድ፡እመልስኻለኹ።

³⁰ይህም፡ምልክት፡ይኾንኻል፤በዚህ፡ዓመት፡የገቦውን፥በኹለተኛውም፡ዓመት፡ከገቦው፡የበቀለውን፡ ትበላላችኹ፤በሦስተኛውም፡ዓመት፡ትዘራላችኹ፡ታጭዱማላችኹ፥ወይንም፡ትተክላላችኹ፡ፍሬውንም፡ ትበላላችኹ።

³¹ያመለጠው፡የይሁዳ፡ቤት፡ቅሬታ፡ሥሩን፡ወደ፡ታች፡ይሰዳ፟ል፥ወደ፡ላይም፡ያፈራል።

³²ከኢየሩሳሌም፡ቅሬታ፡ከጽዮንም፡ተራራ፡ያመለጡት፡ይወጣሉና፤የሰራዊት፡ጌታ፡የእግዚአብሔር፡ቅንአት፡ ይህን፡ያደርጋል።

³³ስለዚህም፡እግዚአብሔር፡ስለአሶር፡ንጉሥ፡እንዲህ፡ይላል፦ወደዚች፡ከተማ፡አይመጣም፥ፍላጻንም፡ አይወረውርባትም፥በጋሻም፡አይመጣባትም፥የዐፈርንም፡ድልድል፡አይደለድልባትም።

³⁴በመጣበት፡መንገድ፡በዚያው፡ይመለሳል፥ወደዚችም፡ከተማ፡አይመጣም፡ይላል፡እግዚአብሔር።

³⁵ስለ፡እኔም፡ስለ፡ባሪያዬም፡ስለ፡ዳዊት፡ይህችን፡ከተማ፡አድናት፡ዘንድ፡እጋርዳታለኹ።

³⁶የእግዚአብሔርም፡መልአክ፡ወጣ፥ከአሶራውያንም፡ሰፈር፡መቶ፡ሰማንያ፡ዐምስት፡ሺሕ፡ገደለ፤ማለዳም፡ በተነሡ፡ጊዜ፥እንሆ፥ዅሉ፡በድኖች፡ነበሩ።

³⁷የአሶርም፡ንጉሥ፡ሰናክሬም፡ተነሥቶ፡ኼደ፥ተመልሶም፡በነነዌ፡ተቀመጠ።

³⁸በአምላኩም፡በናሳራክ፡ቤት፡ሲሰግድ፡ልጆቹ፡አድራሜሌክና፡ሳራሳር፡በሰይፍ፡ገደሉት፤ወደአራራትም፡ አገር፡ኰበለሉ።ልጁም፡አስራዶን፡በርሱ፡ፋንታ፡ነገሠ።