Job

¹ነፍሴ፡ሕይወቴን፡ሰለቸቻት፤ የሐዘን፡እንጕርጕሮዬን፡እለቀዋለኹ፤ በነፍሴም፡ምሬት፡እናገራለኹ።

²እግዚአብሔርን፡እንዲህ፡እለዋለኹ። አትፍረድብኝ፤የምትከራከረኝ፡ለምን፡እንደ፡ኾነ፡ንገረኝ።

³ልታስጨንቅና፡የእጅኽን፡ሥራ፡ልትንቅ፡ የኃጥኣንንስ፡ምክር፡ልታበራ፡ ባንተ፡ዘንድ፡መልካም፡ነውን፧

⁴በእውኑ፡የሥጋ፡ዐይን፡አለኽን፧ ወይስ፡ሰው፡እንደሚያይ፡ታያለኽን፧

⁶ወይስ፡ክፋቴን፡ትፈላለግ፡ዘንድ፥ ኀጢአቴንም፡ትመረምር፡ዘንድ፥ ዘመንኽ፡እንደ፡ሰው፡ዘመን፡ነውን፧ ወይስ፡ዓመታትኽ፡እንደ፡ሰው፡ዓመታት፡ናቸውን፧

⁷ከዚህም፡በላይ፡በደለኛ፡እንዳልኾንኹ፥ ከእጅኽም፡የሚያድን፡እንደሌለ፡አንተ፡ታውቃለኽ።

⁸እጅኽ፡ለወሰችኝ፥ሠራችኝም፤ ከዚያም፡በዃላ፡ዞረኽ፡ታጠፋኝ፡ዘንድ፡ፈለግኽ።

⁹እንደ፡ጭቃ፡አድርገኽ፡እንደ፡ለወስኸኝ፡ዐስብ፤ ወደ፡ትቢያም፡ትመልሰኛለኽን፧

¹⁰በእውኑ፡እንደ፡ወተት፡አላፈሰስኸኝምን፧ እንደ፡ርጎስ፡አላረጋኸኝምን፧

¹¹ቍርበትና፡ሥጋ፡አለበስኸኝ፥ በዐጥንትና፡በዥማትም፡አጠነከርኸኝ።

¹²ሕይወትና፡ቸርነት፡አደረግኽልኝ፤ መጐብኘትኽም፡መንፈሴን፡ጠበቀች።

¹³እነዚህንም፡ነገሮች፡በልብኽ፡ውስጥ፡ሰወርኽ። ይህ፡ዅሉ፡በዐሳብኽ፡እንዳለ፡ዐውቃለኹ። http://www.gzamargna.net www.ethiopianorthodox.org

¹⁴ኀጢአት፡ብሠራ፡አንተ፡ትመለከተኛለኽ፤ ከኀጢአቴም፡ንጹሕ፡አታደርገኝም።

¹⁵በደለኛ፡ብኾን፡ወዮልኝ፤ ጻድቅም፡ብኾን፡ራሴን፡አላነሣም፤ ጕስቍልናን፡ተሞልቻለኹ፥ መከራዬንም፡ተመልክቻለኹ።

¹⁶ራሴም፡ከፍ፡ከፍ፡ቢል፡እንደ፡አንበሳ፡ታድነኛለኽ፤ ተመልሰኽም፡ድንቅ፡ነገር፡ታደርግብኛለኽ፡

¹⁷ምስክሮችኽን፡ታድስብኛለኽ፤ ቍጣኽንም፡ታበዛብኛለኽ፤ ጭፍራ፡በጭፍራ፡ላይ፡ትጨምርብኛለኽ።

¹⁸ስለ፡ምን፡ከማሕፀን፡አወጣኸኝ፧ ዐይን፡ሳያየኝ፡ምነው፡በሞትኹ።

¹⁹እንዳልነበረ፡በኾንኹ፤ ከማሕፀንም፡ወደ፡መቃብር፡በወሰዱኝ።

²⁰የሕይወቴ፡ዘመን፡ጥቂት፡አይደለምን፧

²¹ወደማልመለስበት፡ስፍራ፥ ወደ፡ጨለማና፡ወደሞት፡ጥላ፡ምድር፥

²²እንደ፡ጨለማም፡ወደጨለመች፥ ሥርዐትም፡ወደሌለባት፡ወደሞት፡ጥላ፥ ብርሃኗም፡እንደ፡ጨለማ፡ወደ፡ኾነ፡ምድር፡ሳልኼድ፥ ጥቂት፡እጽናና፡ዘንድ፡ተወኝ፥ልቀቀኝም።