Job

¹ኢዮብም፡መለሰ፡እንዲህም፡አለ፦

²በርግጥ፡እናንተ፡ዐይነተኛዎች፡ሰዎች፡ናችኹ፤ ጥበብም፡ከእናንተ፡ጋራ፡ይሞታል።

³ነገር፡ግን፥እኔ፡ደግሞ፡እንደናንተ፡ማስተዋል፡አለኝ፤ ከእናንተም፡የማንስ፡አይደለኹም፤ እንደዚህ፡ያለውን፡ነገር፡የማያውቅ፡ማን፡ነው፧

⁴እግዚአብሔርን፡የጠራኹ፡ርሱም፡የመለሰልኝ፡እኔ፡ ለባልንጀራው፡መሳለቂያ፡እንደሚኾን፡ሰው፡ኾኛለኹ፤ ጻድቅና፡ፍጹም፡ሰው፡መሳለቂያ፡ኾኗል።

⁵ተዘልሎ፡በሚቀመጥ፡ሰው፡ዐሳብ፡መከራ፡ይናቃል፤ ነገር፡ግን፡እግሩን፡ሊያድጠው፡ተዘጋጅቷል።

⁶የቀማኛዎች፡ድንኳን፡በደኅንነት፡ይኖራል፥ እግዚአብሔርንም፡የሚያስቈጡ፡ተዘልለው፡ተቀምጠዋል፤ እግዚአብሔር፡ዅሉን፡በእጃቸው፡አምጥቶላቸዋል።

⁷አኹን፡ግን፡እንስሳዎችን፡ጠይቅ፥ያስተምሩኽማል፤ የሰማይንም፡ወፎች፡ጠይቅ፥ይነግሩኽማል።

⁸ወይም፡ለምድር፡ተናገር፥ርሷም፡ታስተምርኻለች፤ የባሕርም፡ዓሣዎች፡ይነግሩኻል።

⁹የእግዚአብሔር፡እጅ፡ይህን፡እንዳደረገ፡ ከነዚህ፡ዅሉ፡የማያውቅ፡ማን፡ነው፧

¹⁰የሕያዋን፡ዅሉ፡ነፍስ፡ የሰውም፡ዅሉ፡መንፈስ፡በእጁ፡ናት።

¹¹ምላስ፡መብልን፡እንደሚቀምስ፥ ዦሮ፡ቃልን፡የሚለይ፡አይደለምን፧

¹²በሽምግልና፡ጊዜ፡ጥበብ፥ በዘመንስ፡ርዝመት፡ማስተዋል፡ይገኛል።

¹³በእግዚአብሔር፡ዘንድ፡ጥበብና፡ኀይል፡አለ፤ ለርሱ፡ምክርና፡ማስተዋል፡አለው።

¹⁴እንሆ፥ይፈርሳል፥የፈረሰውም፡ተመልሶ፡አይሠራም፤ በሰውም፡ቢዘጋበት፡የሚከፍትለት፡የለም።

¹⁵እንሆ፥ውሃዎቹን፡ይከለክላል፥እነርሱም፡ይደርቃሉ፤ እንደ፡ገና፡ይሰዳ፟ቸዋል፥ምድሪቱንም፡ይገለብጣሉ። http://www.gzamargna.net www.ethiopianorthodox.org

¹⁶ኀይልና፡ጥበብ፡በርሱ፡ዘንድ፡ናቸው፤ የሚስተውና፡የሚያስተው፡ለርሱ፡ናቸው።

¹⁷መካሮችንም፡እንደ፡ዘረፋ፡ይወስዳቸዋል፥ ፈራጆችንም፡ያሳብዳል።

¹⁸የነገሥታትንም፡እስራት፡ይፈታል፥ ወገባቸውንም፡በመታጠቂያ፡ያስራቸዋል።

¹⁹ካህናትን፡እንደ፡ዘረፋ፡ይወስዳቸዋል፥ ኀያላንንም፡ይገለብጣቸዋል።

²⁰ከታመኑ፡ሰዎችም፡ቋንቋን፡ያርቃል፥ የሽማግሌዎችንም፡ማስተዋል፡ይወስድባቸዋል።

²¹በአለቃዎች፡ላይ፡ንቀትን፡ያፈሳ፟ል፥ የብርቱዎችንም፡መታጠቂያ፡ያላላል።

²²ጥልቅ፡ነገር፡ከጨለማ፡ይገልጣል፥ የሞትንም፡ጥላ፡ወደ፡ብርሃን፡ያወጣል።

²³አሕዛብን፡ከፍ፡ከፍ፡ያደርጋል፥እነርሱንም፡ያጠፋል፤ አሕዛብንም፡ያሰፋል፥እነርሱንም፡ያፈልሳቸዋል።

²⁴ከምድር፡አሕዛብ፡አለቃዎች፡ዘንድ፡ማስተዋልን፡ይወስዳል፥ መንገድም፡በሌለበት፡በረሓ፡ያቅበዘብዛቸዋል።

²⁵ብርሃንም፡ሳይኖር፡በጨለማ፡ይርመሰመሳሉ፤ እንደ፡ሰካራም፡ይቅበዘበዛሉ።