Job

¹ኢዮብም፡መለሰ፡እንዲህም፡አለ፦

²ስሙ፥ቃሌን፡ስሙ፤ ይህም፡መጽናናታችኹ፡ይኹን።

³እናገር፡ዘንድ፡ተዉኝ፤ ከተናገርኹም፡በዃላ፡ተሣለቁ።

⁴በእውኑ፡የሐዘን፡እንጉርጕሮዬ፡ለሰው፡እናገራለኹን፧ አለመታገሥ፡ስለ፡ምን፡አይገ፟ባ፟ኝም፧ http://www.gzamargna.net www.ethiopianorthodox.org

⁵ወደ፡እኔ፡ተመልከቱ፥ተደነቁም፤ እጃችኹንም፡በአፋችኹ፡ላይ፡አኑሩ።

⁶እኔ፡ባሰብኹ፡ቍጥር፡እጨነቃለኹ፥ ጻዕርም፡ሥጋዬን፡ይይዛል።

⁷ስለ፡ምን፡ኀጢአተኛዎች፡በሕይወት፡ይኖራሉ፧ ስለ፡ምንስ፡ያረጃሉ፧በባለጠግነትስ፡ስለ፡ምን፡ይበረታሉ፧

⁸ዘራቸው፡ከነርሱ፡ጋራ፡ጸንቶ፡ይኖራል፥ ልጆቻቸውም፡በዐይናቸው፡ፊት፡ናቸው።

⁹ቤታቸው፡ከፍርሀት፡ወጥቶ፡የታመነ፡ነው፥ የእግዚአብሔርም፡በትር፡የለባቸውም።

¹⁰ኰርማቸው፡ይወልዳል፥ዘሩንም፡አይጥለውም፤ ላማቸውም፡ትወልዳለች፥አትጨነግፍም።

¹¹ሕፃናታቸውን፡እንደ፡መንጋ፡ያወጣሉ፥ ልጆቻቸውም፡ይዘፍናሉ።

¹²ከበሮና፡መሰንቆ፡ወስደው፡ይዘምራሉ፥ በእንቢልታ፡ድምፅ፡ደስ፡ይላቸዋል።

¹³ዕድሜያቸውንም፡በተድላ፡ይፈጽማሉ፤ ድንገትም፡ወደ፡ሲኦል፡ይወርዳሉ።

¹⁴እግዚአብሔርንም፦ከእኛ፡ዘንድ፡ራቅ፤ መንገድኽን፡እናውቅ፡ዘንድ፡አንወድ፟ም።

¹⁵እናመልከውስ፡ዘንድ፡ዅሉን፡የሚችል፡አምላክ፡ማን፡ነው፧ ወይስ፡ወደ፡ርሱ፡ብንጸልይ፡ምን፡ይጠቅመናል፧ይላሉ።

¹⁶እንሆ፥ሀብታቸው፡በእጃቸው፡ውስጥ፡አይደለምን፧ የኃጥኣን፡ምክር፡ከእኔ፡ዘንድ፡የራቀች፡ናት።

¹⁷የኃጥኣን፡መብራት፡የጠፋው፥ መቅሠፍትም፡የመጣባቸው፥ እግዚአብሔርም፡በቍጣው፡መከራ፡የከፈላቸው፥

¹⁸በነፋስ፡ፊት፡እንደ፡ገለባ፥ ዐውሎ፡ነፋስም፡እንደሚወስደው፡ትቢያ፡የኾኑ፡ስንት፡ጊዜ፡ነው፧

¹⁹እናንተ፦እግዚአብሔር፡በደላቸውን፡ለልጆቻቸው፡ይጠብቃል፡ብላችዃል። እነርሱ፡ያውቁ፡ዘንድ፡ፍዳን፡ለራሳቸው፡ይክፈል።

²⁰ዐይኖቻቸው፡ጥፋታቸውን፡ይዩ፥ ዅሉን፡ከሚችል፡አምላክ፡ቍጣ፡ይጠጡ። http://www.gzamargna.net www.ethiopianorthodox.org

²¹የወራታቸውስ፡ቍጥር፡ቢቈረጥ፥ ከነርሱ፡በዃላ፡የቤታቸው፡ደስታ፡ምን፡ይኾናቸዋል፧

²²ከፍ፡ከፍ፡ባሉትስ፡ላይ፡ለሚፈርድ፡ለእግዚአብሔር፡ በእውኑ፡ሰው፡ዕውቀትን፡ያስተምራልን፧

²³አንድ፡ሰው፡በሰላም፡ተዘልሎ፡ሲቀመጥ፡ በሙሉ፡ኀይሉ፡ሳለ፡ይሞታል።

²⁴በአንዠቱ፡ውስጥ፡ስብ፡ሞልቷል፥ የዐጥንቶቹም፡ቅልጥም፡ረጥቧል።

²⁵ሌላውም፡ሰው፡መልካምን፡ነገር፡ከቶ፡ሳይቀምስ፡ በተመረረች፡ነፍስ፡ይሞታል።

²⁶በዐፈር፡ውስጥ፡ባንድ፡ላይ፡ይተኛሉ፥ ትልም፡ይከድናቸዋል።

²⁷እንሆ፥ዐሳባችኹን፥ የመከራችኹብኝንም፡ክፉ፡ምክር፡ዐውቄዋለኹ።

²⁸እናንተ፦የከበርቴው፡ቤት፡የት፡ነው፧ ኀጢአተኛውም፡ያደረበት፡ድንኳን፡የት፡ነው፧ብላችዃል።

²⁹መንገድ፡ዐላፊዎችን፡አልጠየቃችኹምን፧ ምልክታቸውን፡አታውቁምን፧

³⁰ኀጢአተኛው፡በመቅሠፍት፡ቀን፡እንደ፡ተጠበቀ፥ በቍጣው፡ቀን፡እንደሚድን።

³¹መንገዱን፡በፊቱ፡የሚናገር፡ማን፡ነው፧ የሠራውንስ፡የሚመልስበት፡ማን፡ነው፧

³²ርሱን፡ግን፡ወደ፡መቃብር፡ይሸከሙታል፥ ሰዎቹም፡በመቃብሩ፡ላይ፡ይጠብቃሉ።

³³የሸለቆው፡ጓል፡ይጣፍጥለታል፤ በዃላውም፡ሰው፡ዅሉ፡ይሳባል፥ በፊቱም፡ቍጥር፡የሌለው፡ጉባኤ፡አለ።

³⁴የምትመልሱልኝ፡ውስልትና፡ነውና፥ በከንቱ፡እንዴት፡ታጽናኑኛላችኹ፧