Job

¹ዅሉን፡ከሚችል፡አምላክ፡ዘንድ፡ዘመናት፡አልተሰወረምና፡ ርሱን፡የሚያውቁ፡ለምን፡ወራቱን፡አያዩም፧

²የድንበሩን፡ምልክት፡የሚያፈርሱ፡አሉ፤ መንጋዎቹን፡በዝብዘው፡ያሰማራሉ።

³የድኻ፡አደጎቹን፡አህያ፡ይነዳሉ፤ የመበለቲቱን፡በሬ፡ስለ፡መያዣ፡ይወስዳሉ። http://www.gzamargna.net www.ethiopianorthodox.org

⁴ድኻዎቹን፡ከመንገዱ፡ያወጣሉ፤ የምድርም፡ችግረኛዎች፡ዅሉ፡ይሸሸጋሉ።

⁵እንሆ፥በምድረ፡በዳ፡እንዳሉ፡እንደ፡ሜዳ፡አህያዎች፥ መብልን፡ፈልገው፡ወደ፡ሥራቸው፡ይወጣሉ፤ ምድረ፡በዳውም፡ለልጆቻቸው፡መብልን፡ይሰጣቸዋል።

⁶እነዚያ፡በዕርሻ፡ውስጥ፡እኽላቸውን፡ያጭዳሉ፤ የበደለኛውንም፡ወይን፡ይቃርማሉ።

⁷ዕራቍታቸውን፡ያለልብስ፡ያድራሉ፥ በብርድ፡ጊዜ፡መጐናጸፊያ፡የላቸውም።

⁸ከተራራዎች፡በሚወርድ፡ዝናብ፡ይረጥባሉ፤ መጠጊያም፡ዐጥተው፡ቋጥኙን፡ያቅፋሉ።

⁹ድኻ፡አደጉን፡ልጅ፡ከጡቱ፡የሚነጥሉ፡አሉ፡ ከችግረኛውም፡መያዣ፡ይወስዳሉ።

¹⁰ያለ፡ልብስ፡ዕራቍታቸውን፡ይኼዳሉ፤ ተርበውም፡ነዶዎችን፡ይሸከማሉ፤

¹¹በእነዚህ፡ሰዎች፡ዐጥር፡ውስጥ፡ዘይት፡ያደርጋሉ፤ ወይንም፡ይጠምቃሉ፥ነገር፡ግን፥ይጠማሉ።

¹²ከከተማውና፡ከገዛ፡ቤቶቻቸው፡ይባረራሉ፤ የልጆችም፡ነፍስ፡ለርዳታ፡ትጮኻለች፤ እግዚአብሔር፡ግን፡ስንፍናቸውን፡አይመለከትም።

¹³እነዚህ፡በብርሃን፡ላይ፡የሚያምፁ፡ናቸው፤ መንገዱን፡አያውቁም፥በጐዳናውም፡አይጸኑም።

¹⁴ነፍሰ፡ገዳዩም፡ሳይነጋ፡ማልዶ፡ይነሣል፤ ችግረኛዎችንና፡ድኻዎችን፡ይገድላል፤ በሌሊትም፡እንደ፡ሌባ፡ነው።

¹⁵የአመንዝራም፡ዐይን፡ድግዝግዝታን፡ይጠብቃል። የማንም፡ዐይን፡አያየኝም፡ይላል፥ ፊቱንም፡ይሸፍናል።

¹⁶ቤቶቹን፡በጨለማ፡ይነድላሉ፤ በቀን፡ይሸሸጋሉ፤ ብርሃንም፡አያውቁም።

¹⁷የጧት፡ብርሃን፡ለእነርሱ፡ዅሉ፡እንደ፡ሞት፡ጥላ፡ነው፤ የሞትን፡ጥላ፡ድንጋጤ፡ያውቃሉና። http://www.gzamargna.net www.ethiopianorthodox.org

¹⁸እነርሱ፡በውሃ፡ፊት፡ላይ፡በረ፟ው፡ያልፋሉ፤ ዕድል፡ፈንታቸውም፡በምድር፡ላይ፡የተረገመች፡ናት፤ ወደ፡ወይኑ፡ቦታ፡መንገድ፡አይዞሩም።

¹⁹ድርቅና፡ሙቀት፡የዐመዳዩን፡ውሃ፡ያጠፋሉ፤ እንዲሁ፡ሲኦል፡በደለኛዎችን፡ታጠፋለች።

²⁰ማሕፀን፡ትረሳዋለች፤ ትልም፡በደስታ፡ይጠባዋል፤ ዳግመኛም፡አይታሰብም፤ ክፋትም፡እንደ፡ዛፍ፡ይሰበራል።

²¹የማትወልደውን፡መካኒቱን፡ይበድላታል፤ ለመበለቲቱም፡በጎነት፡አያደርግም።

²²ነገር፡ግን፥በኀይሉ፡ኀያላንን፡ይስባል፤ ርሱም፡በተነሣ፡ጊዜ፡ሰው፡በሕይወቱ፡አይታመንም።

²³እግዚአብሔር፡በደኅና፡አኑሯቸዋል፥ በዚያም፡ይታመናሉ፤ ዐይኖቹ፡ግን፡በመንገዳቸው፡ላይ፡ናቸው።

²⁴ጥቂት፡ጊዜ፡ከፍ፡ከፍ፡ይላሉ፤ ይኼዳሉ፥ይጠወልጋሉም፤ እንደ፡ሌላዎች፡ዅሉ፡ይከማቻሉ፤ እንደ፡እሸትም፡ራስ፡ይቈረጣሉ።

²⁵እንዲህስ፡ባይኾን፡ሐሰተኛ፡የሚያደርገኝ፥ ነገሬንስ፡እንደ፡ምናምን፡የሚያደርገው፡ማን፡ነው፧