Job

¹ኢዮብም፡መለሰ፡እንዲህም፡አለ፦

²ኀይል፡የሌለውን፡ምንኛ፡ረዳኸው! ብርታት፡የሌለውን፡ክንድ፡ምንኛ፡አዳንኸው!

³ጥበብስ፡የሌለውን፡ምንኛ፡መከርኸው! ብዙ፡ዕውቀትንስ፡ምንኛ፡ገለጥኽለት!

⁴ይህንስ፡ቃል፡በማን፡ርዳታ፡ተናገርኽ፧ የማንስ፡መንፈስ፡ከአንተ፡ዘንድ፡ወጣ፧

⁵ሙታን፡ሰዎች፡ከውሃዎች፡በታች፥ በውሃዎችም፡ውስጥ፡ከሚኖሩ፡በታች፡ይንቀጠቀጣሉ።

⁶ሲኦል፡በፊቱ፡ዕራቍቷን፡ናት፥ ለጥፋትም፡መጋረጃ፡የለውም።

⁷ሰሜንን፡በባዶ፡ስፍራ፡ላይ፡ይዘረጋል፥ ምድሪቱንም፡በታቿ፡አንዳች፡አልባ፡ያንጠለጥላል።

⁸ውሃዎችን፡በደመናዎቹ፡ውስጥ፡ያስራል፥ ደመናዪቱም፡ከታች፡አልተቀደደችም።

⁹የዙፋኑን፡ፊት፡ይከድናል፥ ደመናውንም፡ይዘረጋበታል።

¹⁰ብርሃንና፡ጨለማ፡እስከሚለያዩበት፡ዳርቻ፡ድረስ፥ በውሃዎች፡ፊት፡ላይ፡ድንበርን፡አደረገ።

¹¹የሰማይ፡አዕማድ፡ይንቀጠቀጣሉ፥ ከተግሣጹም፡የተነሣ፡ይደነግጣሉ።

¹²በኀይሉ፡ባሕርን፡ጸጥ፡ያደርጋል፥ በማስተዋሉም፡ረዓብን፡ይመታል።

¹³በመንፈሱ፡ሰማያት፡ውበትን፡አገኙ፥ እጁም፡በራሪዪቱን፡እባብ፡ወጋች።

¹⁴እንሆ፥ይህ፡የመንገዱ፡ዳርቻ፡ብቻ፡ነው፤ ይህም፡የሰማነው፡ነገር፡ምንኛ፡ጥቂት፡ነው! የኀይሉንስ፡ነጐድጓድ፡ያስተውል፡ዘንድ፡ማን፡ይችላል፧ http://www.gzamargna.net www.ethiopianorthodox.org