Job

¹ኢዮብም፡ምሳሌውን፡ይመስል፡ዘንድ፡ደገመ፥እንዲህም፡አለ፦

²ፍርዴን፡ያስወገደ፡ሕያው፡እግዚአብሔርን! ነፍሴንም፡መራራ፡ያደረገ፡ዅሉን፡የሚችል፡ሕያው፡አምላክን!

³እስትንፋሴ፡በእኔ፡ውስጥ፥ የእግዚአብሔርም፡መንፈስ፡ባፍንጫዬ፡ውስጥ፡ገና፡ሳለ፥

⁴ከንፈሬ፡ኀጢአትን፡አትናገርም፥ አንደበቴም፡ሽንገላን፡አያወጣም።

⁵እናንተን፡ማጽደቅ፡ከእኔ፡ዘንድ፡ይራቅ፤ እስክሞት፡ድረስ፡ፍጹምነቴን፡ከእኔ፡አላርቅም።

⁶ጽድቄን፡እይዛለኹ፡ርሱንም፡አልተውም፤ ከቀኖቼም፡ዅሉ፡ስለ፡አንዱ፡ልቤ፡አይዘልፈኝም።

⁷ጠላቴ፡እንደ፡በደለኛ፥ በእኔ፡ላይም፡የሚነሣ፡እንደ፡ኀጢአተኛ፡ይኹን።

⁸እግዚአብሔር፡ባጠፋውና፡ነፍሱን፡በለየ፡ጊዜ፥ የዝንጉ፡ሰው፡ተስፋው፡ምንድር፡ነው፧

⁹በእውኑ፡መከራ፡በመጣበት፡ጊዜ፥ እግዚአብሔር፡ጩኸቱን፡ይሰማልን፧

¹⁰ዅሉንስ፡በሚችል፡አምላክ፡ደስ፡ይለዋልን፧ እግዚአብሔርንስ፡ዅልጊዜ፡ይጠራልን፧

¹¹እኔ፡ስለእግዚአብሔር፡እጅ፡አስተምራችዃለኹ፤ ዅሉን፡በሚችል፡አምላክ፡ዘንድ፡ያለውን፡አልሸሽግም።

¹²እንሆ፥ዅላችኹ፡አይታችዃል፤ ስለ፡ምን፡ከንቱ፡ኾናችኹ፧

¹³ይህች፡ከእግዚአብሔር፡ዘንድ፡የበደለኛ፡ዕድል፡ፈንታ፥ ግፈኛም፡ዅሉን፡ከሚችል፡አምላክ፡ዘንድ፡የሚቀበላት፡ርስት፡ናት፤

¹⁴ልጆቹ፡ቢበዙ፡ለሰይፍ፡ይኾናሉ፤ ዘሩም፡እንጀራን፡አይጠግብም።

¹⁵ለርሱም፡የቀሩት፡በቸነፈር፡ይቀበራሉ፤ መበለቶቻቸውም፡አያለቅሱም።

¹⁶ርሱ፡ብርን፡እንደ፡ዐፈር፡ቢከምር፥ ልብስንም፡እንደ፡ጭቃ፡ቢያዘጋጅ፥

¹⁷ርሱ፡ያዘጋጀው፡ይኾናል፥ነገር፡ግን፥ጻድቅ፡ይለብሰዋል፤ http://www.gzamargna.net www.ethiopianorthodox.org ብሩንም፡ንጹሓን፡ይከፋፈሉታል።

¹⁸የሚሠራው፡ቤት፡እንደ፡ሸረሪት፡ድር፡ይሠራል፥ ጠባቂም፡እንደሚሠራው፡ጐዦ፡ነው።

¹⁹ባለጠጋ፡ኾኖ፡ይተኛል፥ዳግመኛም፡አይተኛም፤ ዐይኑን፡ይከፍታል፥ርሱም፡የለም።

²⁰ድንጋጤ፡እንደ፡ጐርፍ፡ታገኘዋለች፤ በሌሊትም፡ዐውሎ፡ነፋስ፡ትነጥቀዋለች።

²¹የምሥራቅ፡ነፋስ፡ያነሣዋል፥ርሱም፡ይኼዳል፤ ከቦታውም፡ይጠርገዋል።

²²ርሱ፡ይጥልበታል፥አይራራለትም፤ ከእጁ፡ፈጥኖ፡መሸሽ፡ይወዳ፟ል።

²³ሰው፡በእጁ፡ያጨበጭብበታል፤ ከስፍራውም፡በፉጨት፡ያስወጡታል።