Job

¹በእውነት፡ብር፡የሚወጣበት፥ ወርቅም፡የሚነጠርበት፡ስፍራ፡አለ።

²ብረት፡ከመሬት፡ውስጥ፡ይወሰዳል፤ መዳብም፡ከድንጋይ፡ይቀለጣል።

³ሰው፡ለጨለማ፡ፍጻሜን፡ያደርጋል፤ የጨለማውንና፡የሞት፡ጥላን፡ድንጋይ፡እስከ፡ወሰኑ፡ድረስ፡ይፈላልጋል።

⁴ሰው፡ከሚኖርበት፡ርቀው፡መውረጃ፡ይቈፍራሉ፤ ከሰውም፡እግር፡ተረሱ፥ ከሰዎችም፡ርቀው፡እየተንጠለጠሉ፡ይወዛወዛሉ።

⁵እንጀራ፡ከምድር፡ውስጥ፡ይወጣል፤ በእሳትም፡እንደሚኾን፡ታችኛው፡ይገለበጣል።

⁶ድንጋይዋ፡የሰንፔር፡ስፍራ፡ነው፥ የወርቅም፡ድቃቂ፡አለው።

⁷መንገዷን፡ጭልፊት፡አያውቀውም፥ የአሞራም፡ዐይን፡አላየውም።

⁸የትዕቢት፡ልጆች፡አልረገጧትም፥ ደቦል፡አንበሳ፡አላለፈባትም።

⁹ሰው፡ወደ፡ቡላድ፡ድንጋይ፡እጁን፡ይዘረጋል፥ http://www.gzamargna.net www.ethiopianorthodox.org ተራራውንም፡ከመሠረቱ፡ይገለብጣል።

¹⁰ከድንጋይ፡ውስጥ፡መንዶልዶያ፡ይወቅራል፤ ዐይኑም፡ዕንቍን፡ዅሉ፡ታያለች።

¹¹ፈሳሹም፡እንዳይንጠባጠብ፡ይገድባል፤ የተሰወረውንም፡ነገር፡ወደ፡ብርሃን፡ያወጣል።

¹²ነገር፡ግን፥ጥበብ፡የምትገኘው፡ወዴት፡ነው፧ የማስተዋልስ፡ስፍራ፡ወዴት፡ነው፧

¹³ሰው፡መንገዷን፡አያውቅም፤ በሕያዋን፡ምድር፡አትገኝም።

¹⁴ቀላይ፦በእኔ፡ውስጥ፡የለችም፡ይላል፤ ባሕርም፦በእኔ፡ዘንድ፡የለችም፡ይላል።

¹⁵በምዝምዝ፡ወርቅ፡አትገኝም፥ ብርም፡ስለ፡ዋጋዋ፡አይመዘንም።

¹⁶በኦፊር፡ወርቅ፥ በከበረም፡መረግድና፡በሰንፔር፡አትገመትም።

¹⁷ወርቅና፡ብርጭቆ፡አይወዳደሯትም፥ በጥሩ፡ወርቅም፡ዕቃ፡አትለወጥም።

¹⁸ስለ፡ዛጐልና፡ስለ፡አልማዝ፡አይነገርም። የጥበብ፡ዋጋ፡ከቀይ፡ዕንቍ፡ይልቅ፡ይበልጣል።

¹⁹የኢትዮጵያ፡ቶጳዝዮን፡አይተካከላትም፥ በጥሩም፡ወርቅ፡አትገመትም።

²⁰እንግዲያሳ፡ጥበብ፡ከወዴት፡ትመጣለች፧ የማስተዋልስ፡ስፍራ፡ወዴት፡ነው፧

²¹ከሕያዋን፡ዅሉ፡ዐይን፡ተሰውራለች፥ ከሰማይ፡ወፎች፡ተሸሽጋለች።

²²ጥፋትና፡ሞት፦ወሬዋን፡በዦሮዎቻችን፡ሰማን፡ብለዋል።

²³እግዚአብሔር፡መንገዷን፡ያስተውላል፥ ርሱም፡ስፍራዋን፡ያውቃል።

²⁴ርሱም፡የምድርን፡ዳርቻ፡ይመለከታል፥ ከሰማይም፡በታች፡ያለውን፡ዅሉ፡ያያል።

²⁵ለነፋስ፡ሚዛንን፡ባደረገለት፡ጊዜ፥ ውሃዎችንም፡በስፍር፡በሰፈረ፡ጊዜ፥

²⁶ለዝናብም፡ሥርዐትን፥ http://www.gzamargna.net www.ethiopianorthodox.org ለነጐድጓድ፡መብረቅም፡መንገድን፡ባደረገ፡ጊዜ፥

²⁷በዚያን፡ጊዜ፡አያት፥ገለጣትም፤ አዘጋጃትም፥ደግሞም፡መረመራት።

²⁸ሰውንም፦እንሆ፥እግዚአብሔርን፡መፍራት፡ጥበብ፡ነው፤ ከኀጢአትም፡መራቅ፡ማስተዋል፡ነው፡አለው።