Job

¹ከዚያም፡በዃላ፡ኢዮብ፡አፉን፡ከፍቶ፡የተወለደበትን፡ቀን፡ረገመ።

²ኢዮብም፡መለሰ፡እንዲህ፡አለ፦

³ያ፡የተወለድኹበት፡ቀን፡ይጥፋ፥ ያም፦ወንድ፡ልጅ፡ተፀነሰ፡የተባለበት፡ሌሊት።

⁴ያ፡ቀን፡ጨለማ፡ይኹን፤ እግዚአብሔር፡ከላይ፡አይመልከተው፥ ብርሃንም፡አይብራበት።

⁵ጨለማና፡የሞት፡ጥላ፡የራሳቸው፡ገንዘብ፡ያድርጉት፤ ዳመናም፡ይረፍበት፤ የቀን፡ጨለማ፡ዅሉ፡ያስፈራው።

⁶ያን፡ሌሊት፡ጨለማ፡ይያዘው፤ በዓመቱ፡ቀኖች፡መካከል፡ደስ፡አይበለው፤ በወሮች፡ውስጥ፡ገብቶ፡አይቈጠር።

⁷እንሆ፥ያ፡ሌሊት፡መካን፡ይኹን፤ እልልታ፡አይግባበት።

⁸ሌዋታንን፡ለማንቀሳቀስ፡የተዘጋጁ፡ ቀኑን፡የሚረግሙ፡ይርገሙት።

⁹አጥቢያ፡ኮከቦች፡ይጨልሙ፤ ብርሃንን፡ቢጠባበቅ፡አያግኘው፥ የንጋትንም፡ቅንድብ፡አይይ፤

¹⁰የእናቴን፡ማሕፀን፡ደጅ፡አልዘጋምና፥ መከራንም፡ከዐይኔ፡አልሰወረምና።

¹¹በማሕፀን፡ሳለኹ፡ስለ፡ምን፡አልሞትኹም፧ ከሆድስ፡በወጣኹ፡ጊዜ፡ፈጥኜ፡ስለ፡ምን፡አልጠፋኹም፧

¹²ጕልበቶች፡ስለ፡ምን፡ተቀበሉኝ፧ http://www.gzamargna.net www.ethiopianorthodox.org ጡትስ፡ስለ፡ምን፡ጠባኹ፧

¹³አኹን፡ተኝቼ፡ዝም፡ባልኹ፡ነበር፤ አንቀላፍቼ፡ባረፍኹ፡ነበር፤

¹⁴የፈረሰውን፡ለራሳቸው፡ከሚሠሩት፡ ከምድር፡ነገሥታትና፡መካሮች፡ጋራ፥

¹⁵ወይም፡ቤታቸውን፡ብር፡ከሞሉ፡ ወርቅም፡ካላቸው፡መኳንንት፡ጋራ፥

¹⁶ወይም፡እንደ፡ተቀበረ፡ጭንጋፍ፥ ብርሃንም፡እንዳላዩ፡ሕፃናት፡በኾንኹ፡ነበር።

¹⁷ክፉዎች፡በዚያ፡መናደዳቸውን፡ይተዋሉ፤ በዚያም፡ደካማዎች፡ያርፋሉ።

¹⁸በዚያ፡ግዞተኛዎች፡በአንድነት፡ተዘልለው፡ተቀምጠዋል፤ የአስጨናቂውን፡ድምፅ፡አይሰሙም።

¹⁹ታናሽና፡ታላቅ፡በዚያ፡አሉ፤ ባሪያም፡ከጌታው፡ነጻ፡ወጥቷል።

²⁰በመከራ፡ላሉት፡ብርሃን፥ ነፍሳቸው፡መራራ፡ለኾነችባቸው፥

²¹የተሰወረ፡ሀብትን፡ከሚቈፍሩ፡ይልቅ፡ ሞትን፡ለሚጠብቁ፡ለማያገኙትም፥

²²መቃብርን፡ባገኙ፡ጊዜ፡ በእልልታ፡ደስ፡ለሚላቸው፥ሐሤትንም፡ለሚያደርጉ፡ ሕይወት፡ስለ፡ምን፡ተሰጠ፧

²³መንገዱ፡ለተሰወረበት፡ሰው፥ እግዚአብሔርም፡በዐጥር፡ላጠረው፡ ብርሃን፡ስለ፡ምን፡ተሰጠ፧

²⁴ከእንጀራዬ፡በፊት፡ልቅሶዬ፡መጥቷልና፥ ጩኸቴም፡እንደ፡ውሃ፡ፈስሷል።

²⁵የፈራኹት፡ነገር፡መጥቶብኛልና፥ የደነገጥኹበትም፡ደርሶብኛል።

²⁶ተዘልዬ፡አልተቀመጥኹም፥አልተማመንኹም፥አላረፍኹም፤ ነገር፡ግን፡መከራ፡መጣብኝ።