Job

¹አኹንም፡ጥራ፤የሚመልስልኽ፡አለን፧ ከቅዱሳንስ፡ወደ፡ማናቸው፡ትዞራለኽ፧

²ሰነፉን፡ሰው፡ቍጣ፡ይገድለዋል፥ ሰነፉንም፡ቅንአት፡ያጠፋዋል።

³ሰነፍ፡ሰው፡ሥር፡ሰዶ፟፡አየኹት፥ ድንገትም፡መኖሪያውን፡ረገምኹ።

⁴ልጆቹም፡ከደኅንነት፡ርቀዋል፥ በበርም፡ውስጥ፡ተረግጠዋል፥ የሚታደጋቸውም፡የለም።

⁵የሰበሰበውንም፡ራብተኛ፡ይበላዋል፥ ከሾኽም፡ውስጥ፡እንኳ፡ያወጣዋል፤ የተጠማ፡ሀብታቸውን፡ዋጠ።

⁶ችግር፡ከትቢያ፡አይመጣም፥ መከራም፡ከመሬት፡አይበቅልም፤

⁷የአሞራ፡ግልገሎች፡ግን፡ወደ፡ላይ፡እየበረሩ፡ከፍ፡እንዲሉ፥ ሰው፡እንዲሁ፡ለመከራ፡ተወልዷል።

⁸እኔ፡ግን፡እግዚአብሔርን፡እለምን፡ነበር፥ ነገሬንም፡ወደ፡እግዚአብሔር፡አቀርብ፡ነበር።

⁹የማይመረመረውን፡ታላቅ፡ነገርና፡ የማይቈጠረውን፡ተኣምራት፡ያደርጋል።

¹⁰በምድር፡ላይ፡ዝናብን፡ይሰጣል፥ http://www.gzamargna.net www.ethiopianorthodox.org በዕርሻም፡ላይ፡ውሃ፡ይልካል።

¹¹የተዋረዱትን፡ወደ፡ላይ፡ያወጣል፥ ሐዘንተኛዎችንም፡ለደኅንነት፡ከፍ፡ከፍ፡ያደርጋቸዋል።

¹²እጃቸውም፡ምክራቸውን፡እንዳይፈጽም፡ የተንኰለኛዎችን፡ዐሳብ፡ከንቱ፡ያደርገዋል።

¹³ጠቢባንን፡በተንኰላቸው፡ይይዛቸዋል፤ የጠማማዎችንም፡ምክር፡ይዘረዝራል።

¹⁴በቀን፡ጨለማን፡ያገኛሉ፥ በቀትርም፡ጊዜ፡በሌሊት፡እንዳሉ፡ይርመሰመሳሉ።

¹⁵ድኻውንም፡ከአፋቸው፡ሰይፍ፡ ከኀያሉም፡እጅ፡ያድነዋል።

¹⁶ለምስኪኑም፡ተስፋ፡አለው፤ ክፋት፡ግን፡አፏን፡ትዘጋለች።

¹⁷እንሆ፥እግዚአብሔር፡የሚገሥጸው፡ሰው፡ምስጉን፡ነው፤ ስለዚህ፡ዅሉን፡የሚችለውን፡የአምላክን፡ተግሣጽ፡አትናቅ።

¹⁸ርሱ፡ይሰብራል፥ይጠግንማል፤ ያቈስላል፥እጆቹም፡ይፈውሳሉ።

¹⁹በስድስት፡ክፉ፡ነገር፡ውስጥ፡ያድንኻል፥ በሰባትም፡ውስጥ፡ክፋት፡አትነካኽም።

²⁰በራብ፡ጊዜ፡ከሞት፥ በሰልፍም፡ከሰይፍ፡እጅ፡ያድንኻል።

²¹ከምላስ፡ጅራፍ፡ትሰወራለኽ፤ ጥፋትም፡ሲመጣ፡አትፈራም።

²²በጥፋትና፡በራብ፡ላይ፡ትሥቃለኽ፤ ከምድረ፡በዳ፡አራዊትም፡አትፈራም፤

²³ቃል፡ኪዳንኽ፡ከምድረ፡በዳ፡ድንጋይ፡ጋራ፡ይኾናልና፤ የምድረ፡በዳም፡አራዊት፡ከአንተ፡ጋራ፡ይስማማሉና።

²⁴ድንኳንኽም፡በሰላም፡እንዲኾን፡ታውቃለኽ፤ በረትኽን፡ትጐበኛለኽ፡አንዳችም፡አይጐድልብኽም።

²⁵ዘርኽም፡ታላቅ፡እንዲኾን፥ ትውልድኽም፡እንደምድር፡ሣር፡እንዲኾን፡ታውቃለኽ።

²⁶በወራቱ፡የእኽሉ፡ነዶ፡ወደ፡ዐውድማ፡እንዲገባ፥ በረዥም፡ዕድሜ፡ወደ፡መቃብር፡ትገባለኽ። http://www.gzamargna.net www.ethiopianorthodox.org

²⁷እንሆ፥ይህችን፡መረመርን፥የሰማነውም፡ይህ፡ነው፤ አንተ፡ግን፡አንዳች፡ሠርተኽ፡እንደ፡ኾነ፡ለራስኽ፡ዕወቀው።