Job

¹በምድር፡ላይ፡የሰው፡ሕይወት፡ብርቱ፡ሰልፍ፡አይደለምን፧ ወራቱም፡እንደ፡ምንደኛ፡ወራት፡አይደለምን፧

²አገልጋይ፡ጥላ፡እንደሚመኝ፥ ምንደኛም፡ደመ፡ወዙን፡እንደሚጠብቅ፥

³እንዲሁ፡ዕጣዬ፡የከንቱ፡ወራት፡ኾነብኝ፥ የድካምም፡ሌሊት፡ተወሰነችልኝ።

⁴በተኛኹ፡ጊዜ፦መቼ፡እነሣለኹ፧እላለኹ። ሌሊቱ፡ግን፡ይረዝማል፥ እስኪነጋ፡ድረስም፡እገለባበጣለኹ።

⁵ሥጋዬ፡ትልና፡ጓል፡ለብሷል፤ ቍርበቴ፡ያፈከፍካል፡እንደ፡ገናም፡ይመግላል።

⁶ዘመኔ፡ከሸማኔ፡መወርወሪያ፡ይልቅ፡ይቸኵላል፥ ያለ፡ተስፋም፡ያልቃል።

⁷ሕይወቴ፡እስትንፋስ፡እንደ፡ኾነ፡ዐስብ፤ ዐይኔ፡መልካም፡ነገርን፡ከእንግዲህ፡ወዲህ፡አያይም።

⁸የሚያየኝ፡ሰው፡ዐይን፡ከእንግዲህ፡ወዲህ፡አያየኝም፤ ዐይንኽ፡በእኔ፡ላይ፡ይኾናል፥እኔም፡አልገኝም።

⁹ደመና፡ተበትኖ፡እንደሚጠፋ፥ እንዲሁ፡ወደ፡ሲኦል፡የሚወርድ፡ዳግመኛ፡አይወጣም።

¹⁰ወደ፡ቤቱ፡ዳግመኛ፡አይመለስም፥ ስፍራውም፡ዳግመኛ፡አያውቀውም።

¹¹ስለዚህም፡አፌን፡አልከለክልም፤ በመንፈሴ፡ጭንቀትን፡እናገራለኹ፤ በነፍሴ፡ምሬት፡በሐዘን፡አንጐራጕራለኹ።

¹²ጠባቂ፡ታስነሣብኝ፡ዘንድ፥ እኔ፡ባሕር፡ወይስ፡ዐንበሪ፡ነኝን፧

¹³እኔም፦ዐልጋዬ፡ያጽናናኛል፥ መኝታዬም፡የሐዘን፡እንጕርጕሮዬን፡ያቀልልኛል፡ባልኹ፡ጊዜ፥

¹⁴አንተ፡በሕልም፡ታስፈራራኛለኽ፥ በራእይም፡ታስደነግጠኛለኽ፤

¹⁵ነፍሴም፡ከዐጥንቴ፡ይልቅ፡ http://www.gzamargna.net www.ethiopianorthodox.org መታነቅንና፡ሞትን፡መረጠች።

¹⁶ሕይወቴን፡ናቅዃት፤ለዘለዓለም፡ልኖር፡አልወድ፟ም። የሕይወቴ፡ዘመን፡እስትንፋስ፡ነውና፥ተወኝ።

¹⁷ሰው፡ምንድር፡ነው፡ታከብረው፡ዘንድ፥ ልብኽንስ፡ትጥልበት፡ዘንድ፥

¹⁸ማለዳ፡ማለዳስ፡ትጐበኘው፡ዘንድ፥ ዅልጊዜስ፡ትፈታተነው፡ዘንድ፧

¹⁹የማትተወኝ፡እስከ፡መቼ፡ነው፧ ምራቄንስ፡እስክውጥ፡ድረስ፡የማትለቀ፟ኝ፡እስከ፡መቼ፡ነው፧

²⁰ሰውን፡የምትጠብቅ፡ሆይ፥በድዬስ፡እንደ፡ኾነ፡ምን፡ላድርግልኽ፧ ስለ፡ምን፡እኔን፡ለአንተ፡ዐላማ፡አደረግኸኝ፧ ስለ፡ምን፡እኔ፡ሸክም፡ኾንኩብኽ፧

²¹ስለ፡ምን፡መተላለፌን፡ይቅር፡አትልም፧ ኀጢአቴንስ፡ስለ፡ምን፡አታስወግድልኝም፧ አኹን፡በምድር፡ውስጥ፡እተኛለኹ፤ ማለዳ፡ትፈልገኛለኽ፥አታገኘኝም።